電話響起～
我：「你好，乜乜診所」
一把男聲：「喂？我有嘢想問呀」
我：「嗯，請講」
佢：「要割嘢嘅話應該用幾多度角入手呀？」
割咩呢又？點解你哋咁鍾意DIY嘅？你哋嘅夢想係做一位醫生嗎？但係冇醫生牌嘅話就係肉類分割技術員。
我：「先生你如果有咩唔舒服就直接嚟睇醫生啦，如果你有需要做小手術嘅話，醫生都可以轉介你去」
佢：「你幫我問吓用幾多度角入手得㗎啦」
你不如試吓用嗰啲視像診症服務問醫生呀？
我：「唔好意思呀先生，我哋唔會喺電話度答呢啲㗎」
佢：「咁會答啲咩呀？」
我：「幾點開工幾點收工你份報告返咗未之類」
佢：「專登裝條電話線答呢啲？」
係呀，所以我成日都建議醫生收個電話皮，每一個月就可以慳返98蚊，咁同租金嘅距離又會拉近一大步啦。
我：「你有咩唔舒服有咩問題就直接嚟診所登記睇醫生啦，今日我哋收八點」
佢：「我可以自己割㗎，不過唔知幾多度入手會割得乾淨啲，我唔想有手尾跟呀」
你自己玩咁大分分鐘都大把手尾啦。
我：「有咩都嚟睇醫生先啦」
佢：「唔駛呀？雞眼咋喎？唔係屎眼喎」
唔好意思，正常人認知嘅屎眼係凹嘅，請問可以點割？
我：「都係俾醫生處理啦」
嘟。佢CUT咗我線。
做咩呀？你割錯咗屎眼呀？
Search